Pasque Veronesi

Da Wikidino

                                  LE PASQUE VERONESI

Le Pasque Veronesi iè on avenimento storico de insuression dela cità de Verona e province, contro le truppe francesi comandè da Napoleone Bonaparte.

Le se ciama “Pasque Veronesi” parchè la rivolta contro i francesi, che durante l’asediamento della cità i ga portà ia tuto ai citadini veronesi, l’è scumisià la matina del 17 april 1797 el secondo dì de Pasqua (el lunedì de Pasqueta) con una serie de provocasioni da parte dei francesi che fa nassar i primi incidenti e i veronesi, che no i ghe ne podea più de sti soprusi francesi, ale sinque del dopomesogiorno durante i Vespri, esasperè, i risponde col grido “Viva San Marco!” (sperando nei aiuti da Venessia e dal’Impero ma che nel fratempo l’avea za siglà con Napoleone i preliminari de pace e quindi i aiuti a Verona no iè mai rivè) e par nove giorni i combate casa par casa, i assalta le piazzeforti…(ghe da dir che la popolasion veronese no l’era esperta nel maneggio dei cannoni e ia fato quel che i podea).

La popolasion l’è riusia a far fora piassè de mile soldati francesi che i sercava de salvarse rifiugiandose rento Castelvecio e nei castei colinari de San Felice e San Pietro: da qua par tri giorni intieri i bombardava Verona dall’alto. Dale campagne migliaia de contadini iè arivè par socorar i Veronesi che combateva rento le mura guidè da Francesco Emilei; i primi iè stè i abitanti dela Valpolicella, dopo è vegnuo i montagnari della Lessinia e una serie de volontari in armi dalla bassa e dall’est veronese. I combateva incoragè dal suono del Rengo, la vecia campana della Torre dei Lamberti, che l’era el simbolo della vecia autonomia comunale.

Stà insuresion l’è finia el 25 april del 1797 (el giorno de San Marco) con l’acerchiamento dela cità da parte de 15.000 soldati francesi che ia assedià la cità e el popolo veronese al limite dele forse l’ha dovuo arendarse. Le autorità Venessiane, che no le avea fato gnente par sostegnar el moto de ribelion de Verona, ià legitimà la rappresaglia francese e Napoleone, con la fucilasion de Emilei e altri veronesi, l’ha messo la parola “fine” al tentativo de ribelion dei veronesi. Le conseguense de sta rivolusion l’è stà che la cità l’è stà costreta a dover pagar schei e i francesi i sa portà ia na marea de opere d’arte e beni italiani.

-Annalisa-