Moéche e Masenéte

Da Wikidino

Moéche e maśenéte le xe na stupenda specialità dea cusina Venexiana.

La Moéca xe el nome con cui i venexiani ciama el granso “granchio verde della specie Carcinus moenas”, (moenas no ga ninte a ke vedare co mona...), cuando ke'l riva al culmine dea fase de muta indoe el perde la corasa poco prima ke el se la ricostruixa, stando in te l'acua de mar. Xe in ste poche ore ke la moéca deventa na prelibatesa, na specilità dea cusina venexiana, na roba da favola par el palato, insoma on piato unico.

La tradision de le moéche xe presente soratuto a Burano, a dirla tuta a venexia sta tradison xe bastansa sovane parchè prima (par circa do secoli), iera un segreto dei moecanti de Ciosa, però i canaje de buranei ga scoperto el segreto e ades anca lori i produse moeche.

Adeso se sleva le moéche in tea laguna a nord de Venexia, dove xe lavorà co le seràie da seca, indoe se tacai i cogòi, trapole a imbuto dove finise dentro i pesi e i gransi.

Le stagion de produsion de sta maraveja le xe do, la Quaresima (marso-april) e la Fraìma (otobre-noembre). I pescadori, na volta ciapà sti gransi nei cogòi de le seràie, i li separa dal pese con cui i xe smisiadi i li porta rento sachi di iuta nei casòni o casòti, i li selesiona e i mete cuei prosimi a la muta , ke i ghe ciama spiantani, in grandi casse de legno (ciamà vièri), metà rento e metà fora da l'acua, eco sti gransi ki in poco tempo i deventarà le famose Moéche . Par fasile a dirse ma xe tut'altro ke fasile, bison controlarli pì volte al dì, solo i gransi sovani i pol diventar moéche, insoma xe on casin solo l'ocio esperto e la esperiensa dei moecanti, sa come e cuando !!

Le Masenéte invese xe le femine de sti gransi, de solito cueste vien bone nel periodo ta majo e lujo e le vien ciapà fin ke le se acopia (varda i moecanti cuando i va romparghe i finferli ... proprio alora) e normalmente co le vien ciapà le xe anca piene de ovi “el coralo”.