Lago de Garda
Da Wikidino
El Lago de Garda originariamente in epoca Romana el se ciamava Benàco, con l'accento sula a. Dopo l'è diventà Bènaco, col'acento sula e. Se volì far i fighi podì dir "Tori del Benàco". Ala fine el s'ha ciamà Lago de Garda da "Vàrda", che no bisogna che ve spiego sa vol dir. In fondo el Lago l'è propri bel da vardar, o no?
Per prima roba, el Lago de Garda l'è de proprietà de tuti quei che ghe abita insima e no solo del paese de Garda, con tuto el rispeto per i so abitanti che i è anca bona sént, anca se i è i unici al mondo a ciamar "peverada" la pearà.
El Lago de Garda l'è un strafanto fato de acqua, aole e todeschi longo 52 chilometri e largo al massimo 16. 16 chilometri i par pochi ma se ve catì sensa bensina su na barca a motor fora da San Vigilio ve consiglio de farve vegner a tor.
Dala parte Veneta el Lago de Garda el presenta un sacco de bei posti, panorami, campeggi, funivie, monti e butèle. Dala parte de là (quela Bresciana par capirse) no ghè gnente, solo deserto e qualche garitta dove se ferma i cavai quando i porta la posta verso Milan. Qualcuno dubita anca che sula sponda Lombarda ghe sia anima viva.
A Sirmion se sta propri ben. (Gaio Valerio Catullo, Sirmione, 84 a.C. – 55 a.C.)
Che bel che l'è el lago! (Johann Wolfgang von Goethe, Bardolì, 28 agosto 1749 – 22 marzo 1832)
Na bela vista ndo portarghe la morosa. Sempre se la morosa la merita.
