Gnochi co la Fioréta
Da Wikidino
Tipico piato de l’alta Val de l’Agno un piato considerà da poareti (anca se deso i sìori i fa milemila kilometri par vegnerselo magnare…n.d.r.), dato che la fìoréta xe un soto prodoto de la lavorasion del late e par ninte nutriente. Sto piato l’era utilisà spexo ne le malghe de montagna dove se fasea i formaji, parchè l’ingrediente principale la Fioréta e el butiero iera disponibili sempre freschi, bastava solo portare la farina in te le malghe.
Par 4 individui:
• ½ litro de fioréta fresca (xe importante ke la sia fresca senò vien on schifo)
• ½ chilo de farina bianca
• 300 grammi de butiero de pana de malga
• 300 grammi de formajo stagionà de malga
• Sale
Se impasta meso litro de fioréta con meso chilo de farina bianca sontandoghe sale, fin a otegnere na densità cremosa tale che al contato col sculiéro la faxa i fili, in maniera da formar on impasto bastansa ligà. Se fa cascar i gnochi ne la pignata co l’acua salà che boje i gnochi i ga da destacarse dal sculiéro co i toca l’acua. Intanto faxì desfare el butiero in te un tegamin a parte fin a renderlo liquido e che el ciapa un coloreto nociola con un fià de sc-iuma. Cuando i gnochi vien par sora cateli su con la sc-iumarola (par controlar la cotura se pol tajarghine uno e vardare che’l sia ben coto anca dentro).
Treli in te na pirofila preferibilmente pre-riscaldà, treghe par sora el formajo dopo vojeghe sora el butiero fuso che gavì parecià prima in te’l tegamin (a piaser vostro podì sontarghe de le foie de salvia).
Fioréta = puina liquida "Al scoro che resta dopo aver fato el formaio, ghe vien xontà el sale amaro o el caio vecio e tuto fato boere. Dopo un poco vien su la fioreta".
Se ringrasia par sta riceta ma sora tuto par l'ospitalità el cogo Giancarlo Asnicar del Ristorante Albergo Al Molino di Recoaro Terme (VI).
Da Wikipedia
