Fora Febraro
Da Wikidino
"Fora Febraro"
Nele zone ai piè dei monti berici (nel vicentin) ogni ultimo giorno de febrar se usa festegiar l’arivo de marso overo “Fora Febraro” (dito anca Ciamar Marso o Bati Marso). Ne l’altopiano de Asiago xe tradision tacar dei falò nei campi par tuta note, a Recoaro se fa la sfilata par el centro con i cari tradizionali, ma l’usansa piassè difusa l’è ciamar Marso coi boti costruii con dele bombole de fero e carburo (i famosi sc-iochi col carburo). E se fa festa no solo con bombole e canoni ma anca andando en giro par le strade fasendo bordel, batendo su cuercioli, pignate e altra bataria de caxa.
La storia la ne dise, ma a scola ste robe no i ne le insegna, che ai tempi dela Republica Veneta fin ala so decadensa nel 1797 l’ano novo el scumisiava el primo marso e cuindi el 28 de febrar l’era l’ultimo dì de l’ano, el “Capodano Veneto”. Usando el calendario dela Repulica Veneta podemo vedar che el mese de Setembre el casca esatamente nel setimo mese de l’ano da cua el nome “sete-mbre” (7) e no come adesso che l’è el nono mese, stesso discorso anca par otobre (8), novembre (9), dicembre (10) e par ultimi genar (11) e febrar (12). El cao de l’ano Veneto, el “Fora febrario o Bati Marso” el se festegiava con on scopo ben preciso ke xera quel de far scapar ia l’inverno e el fredo par ingrasiarse l’arivo dela bela stajon e cuindi scumisiar i laori n’tei campi.
A Valdagno ‘sta tradision xe molto popolar e ogni ano, nei vari paesi e contrade del comune i fa a gara a ci costruise i boti mejo. Nel paese de Maglio di Sopra, se se cata la sera del 28 Febrar en on campo a magnar grigliate de carne, bear vin brulè, bira e naturalmente boti a volontà. Quasi tuti i boti iè costruii con dele bombole de gas ude tajè a metà, a parte serti super boti costruii con du clindri longhi più o meno du metri ciamè “i canoni”. Rento a ste bombole se ghe mete el carburo che, bagnà con l’acqua el fa on gas pronto par l’explosion tacà da on semplice acendin. Par i canoni invese par tarcarli ghe vol on sistema piasè “moderno”, par far esplodar el gas ven usà ‘na candela da moto tacà da on interutor.
‘na vecia poesia nostrana intitolà “Fora Febraro che Marso xe' qua” la dise cosi':
" Coerci e bussolotti
pegnate e antiani roti
in man de sti bociasse
funziona da grancasse.
I pesta che i va' in vento
el core xe' contento
che ringraziando Iddio
l'inverno xe' finio
verzemo le finestre
levemo le coerte
le moneghe e fogare
mandemo a far... lustrare,
metemo via le maje,
pastrani e pelicciotti,
no ste' dirghe canaje,
se i rompe i... bussolotti.
I ciama Primavera
resuscita la tera
co' la stajon novela
la vita xe' piu' bela.
Al Sol primaverile
ghe demo el benvenuto
e anca "el Campanile"
se unisse nel saluto. "
Xe bel vedar ke certe tradisioni popolari le spravive grasie alo sforso de persone ke tegne vivo el ricordo de un pasà ke xe ancora presente. L’è on nostro dover tegnar sempre vive certe tradizioni che le fa parte dela nostra cultura tramandandole ale future generazioni.
-Annalisa
