El Carneal de Verona

Da Wikidino

                                   EL CARNEAL DE VERONA

El carneal l’è on periodo de festa, che se celebra tra Nadal e la Quaresima, de tradision cristiana dove l’ultima setimana se fa festegiamenti con sfilade publiche de gente che bala e se traveste. Ma anca se l’è de tradision cristiana, le orgini del carneal iè ben piassè vecie, difati el ga origine nei stra-veci riti pagani de venerasion dela dea greca Demetra e quela romana de Cerere che iera le divinità dela fertilità e dela agricoltura. L’è na festa ‘ndoe tuto (maschere, acesori, rituali) i gha forti valense simboliche lighè en particolar modo ala celebrasion del novo ano, da pensar come la fine del’inverno e la partensa dela bela stajon che la porta fecondità ala tera e la le fa rigenerar.

A Verona el Carneval l’è però ligà a on vero evento storico suceso nel primo '500 quando ghera ‘na carestia drio l’altra (l’era un bruto periodo, la gente l’era poareta e la morea de fame). Nel 1530/31 dopo ‘na tremenda inondassion de l’Adese e ale disastrose devastasioni par colpa dei Lanzichenecchi (che iera en Italia par la guera tra Carlo V e Francesco I) ghè stà ‘na crisi molto dura, la gente no la ghe ne podea pì e è sciopà ‘na sommossa nel quartier poverissimo de San Zen.

Par sercar de calmar e contegnar l’estension dela rivolta è stà fondà ‘na comission de on grupo de emeriti citadini che i gavea, con i so schei, da procurar e distribuir el magnar ala pora gente.

Tra tuti ‘sti brai citadini ghera anca el dotor del quartier de San Zen, el famoso Tommaso da Vico. I dise che Tommaso l’ultimo venardì de Carneal l’a fato piassè de quel che ghe spetava parchè el ga dato, a quei del so quartier, ‘na mota (grande quantità) de pan, vin, farina, buro e formaio. Sempre par tradission i dise che sto dotor generoso l’à lassà nel so testamento on “lascito perpetuo” a favor dela gente de San Zen par far sì che el Venardi Grasso se podesse distribuir grandi quantità (‘na muccia) de gnochi e vin nela piassa del’Abassia de San Zen Maggiore.

Ven cosita creà el Venardì Gnocolar, la manifestassion piassè importante de tuto el Carneal de Verona.

El programa dela giornada de festa, ai giorni nostri, l’è piena de inissiative. L’è caraterisà dala sfilada dei carri allegorici e dale maschere, che dopo aver incontrà le autorità citadine, le traversa le vie dela cità fin al sagrato dell’abassia de San Zen ‘ndo ven fatta la Gran Gnocolada: se prepara i gnochi che ven dopo oferti ala popolassion en ricordo de l’episodio che ga dato origine al Carneal veronese.

La manifestassion nel tempo la sa slargà a tuti i quartieri dela cità che i partecipa ala sfilata con maschere inventè o ispirè a on personaggio storico o a un mestier.

El “Re” dele maschere veronesi l’è el "Papà del Gnoco" che el guida la sfilata allegorica a caval della so mussetta (che par tradission ala fine del carneval la ven magnà soto forma de pastissada) e che distribuise le caramele ai buteleti. El Papà del Gnoco l’è stà creà nel 1531 e l’è la maschera piasse vecia d’Italia.

Curiosità, col tempo è stà perso alcuni modi de dir coleghè al carneal, par esempio: - “te pari on carneal” quando uno l’è vestio en modo stravagante; - “combinarghene on carneal” quando uno el ghe ne combina de tuti i colori

                                       EL DINO A CARNEAL:

E no se desmenteghemo che anca el Dino el festegia el Carneval! Vardè che bele foto: [1]

--Annalisa 13:10, 20 Zen 2010 (UTC)