Bisso Galeto
Da Wikidino
El bisso galeto l’è ‘na creatura leggendaria, misteriosa, mitologica dele valli veronesi, che la gavea el corpo e la testa de on gal, dele ale piene de spine e la coa de on serpente. Sora la testa el gavea la gresta rossa che la ghe faesa da corona.
El se mostrava come un serpente picenin, longo dai vinti ai trenta schei, ma quando el gavea bisogno el podea diventar grando e slongarse sensa misure e l’era la creatura piassè mortal de tute le altre bestie. Sta bestia la nassea da on ovo deposto ogni tanto da un gal vecio. L’ovo el gavea da essar tondo (sferico) e el gavea da essar coà da on serpente o da on rospo e par coar stò ovo podea volerghe anca nove ani.
Biso Galeto Catìvo
El vivea nei boschi, nelle vallate ma quando el nasea in ‘na casa, de note, el ghe sofiava insima a quei che dormea e la so saliva la consumava quei desgrasiè lì che stava dormendo. El bisso galeto l’era talmente velenoso che el riessea a copar uno solo a guardarlo ‘ntei oci parchè el so sguardo el brusava, el secaa le piante e el contaminava anca l’acqua.
Tuti quei che i vegnea en contato con el so fià o vegnea smorsegà i morea de colpo. Se podea coparlo solo metendoghe en speio de fronte parchè el podesse guardarse. I dise che, ‘na olta nel periodo del medioevo, i cavalieri che proaa a coparlo con le lance i morea de colpo parchè el velen del bisso galetto el se infiltraa su par la lancia e el le fasea morir insieme al caval.
Anca se el par on animal che no more mai, el ga anca lù i so nemici: le donnole (dele bestie che ghe someia un poco ai rati) che però anca se le ghe le fasea a coparlo le moriva anca lore e i gai con el so canto mortal.
Nel 1400 s’è difusa la sifilide, ‘na malatia che ‘na olta l’era mortal e par la gente un poco ignorante ghera sta dito che l’era colpa del velen del bisso galeto.
Ancora adesso ghe el mito del bisso galeto che nela mente dela gente l’è difuso proprio come un serpente velenso che se el te ciapa te diventi catio proprio come el velen de 'sta bestia. Infati in certe zone a certa gente quando l’è massa nervosa o “velenosa” se ghe dise “sa gheto? T’à becà on bisso galeto?” e a quei che no capisse gnente anca a spigarghe le robe çento olte se ghe dise “the ghè ‘na testa che no le magna gnanca i bissi galeti” !
Ma el Bisso galetto el par ghe el gavia dele origini piassè antiche e no solo dele zone veronesi parchè l’è stà associà, visto che el ghe someiava, al “Abraxas” un demone con le ale. L’Abraxas el gavea la testa de on gal, el tronco de ‘n omo, du serpenti come gambe e l’era armà de frusta e scudo. L’Abraxas el vegnea però invocà par guarir le malatie e anca dei nostri tempi gavemo la so simbologia rappresentà sui stemi dele farmacie, ma de ‘na olta, adesso ghe la croce verde, tempo fa ghera el Caduceo, la spada con du serpenti intorcolè ‘drio (quindi quasi stesso dell'Abraxas)
Ecco parchè in certe zone invesse el bisso galetto l’è visto come on spirito positivo, on animal che aiuta la gente, soprattutto i pescatori e quei che laora nei campi.
El bisso galeto e l’Abraxas iè creature imaginarie creè dala gente che volea catar un modo par tacar el mondo terren da quel spirituale.
Intervento de Analisa da Somacampagna
Biso Galeto Antico: da un Stema a Basilea del XVI secolo
